Unki Muskurahaat

Raat ka waqt tha, duniya sone ko chali thi. Main un sooni sadkon par akela chal raha tha, Ek purane darr ko seene mein chhupaye... Tabhi suni maine kisi ki meethi dhuun.

Andhere mein unki parchhai dekhi, toh dil kaanp utha. Laga laut aayi hai phir wahi Amavasya ki kaali raat - Wahi khatarnak toofan jisne mujhe tod diya tha. Darr ke maare maine apni aankhein kass ke band kar li, Laga ab main phir se bikhar jaunga.

Par tabhi... unhone gungunaya. Apni usi pyaar-bhari, shehad jaisi meethi dhuun mein. Woh gaa rahe the duur se, Magar mehsoos hua jaise unhone mujhe gale laga liya ho. Aur kaanon mein dheere se kaha, “Main hoon na.”

Ek filmy si pankti, magar mere liye iske hazaaron arth the. Woh ek awaaz thi jisne kaha: “Darr mat... main khada hoon tumhare liye. Kuch nahi hone dunga tumhe.”

Phir un par roshni padi, aur maine unka chehra dekha. Ek masoom muskurahat, aur aankhon mein woh alag sa noor - Maano Dhruv Taare ki chamak unki nigahon mein utar aayi ho.

Wahi Amavasya ki raat thi, magar unke hone se Woh ek khoobsurat Purnima ki raat ban gayi. Halka kohra, safed khile hue phool, Aur sabse khaas... unki woh muskurahat.