Kaalee Syaahee

Woh ek ladka jisne chhua tha mere hothon ko apne hothon se,

Lekin tha na pata mujhe ke saat saal ki umar mein,

Woh hua tha galat mere komal mann ke saath.

Phir maa-baba se na mila pyaar mujhe,

Na woh shabaashi, na unka mujhe godh mein uthana.

Dard hai mujhe is baat ka,

Ke hui jo galti unse, uske saath rehna pada mujhe pachees saal tak.

Solah ki umar mein mila tha jo ladka,

Jisse dekh socha maine ke banega woh mera saarthi,

Par woh gaya ban kar mera lutera... mere tann aur mann ka.

Uss ghani tufani raat mein, uss bistar par,

Chhod gaya woh mujhe dard mein.

Aur maangi usne maafi mujhse,

Lekin sirf apne patan na hone ke liye.

Laga mujhe uss din se ke banna mujhe ek r*nd hi hai.

Kyunki wahi banta main uske liye har raat.

Mausam badla, hawa ne karwat badli,

Par raat tufani aur dard bhari hi reh gayi.

Phir jab usne mujhe chhoda,

Tab maine apne aap ko uss kaalee syaahee mein paya,

Jo lagata raha woh mujhe har raat,

Kyunki laga mujhe ke bana hoon main usi ke liye.

Kabhi kisi ke dada, kabhi kisi ka pati,

Kabhi kisi ka mangetar, toh kabhi kisi ka bhai.

Sabne mere mann aur tann ko cheera.

Ab koi pyaar se bhi chhue, toh lagta hai,

Jaise laga di kisi ne mere upar wahi kaalee syaahee.

Chhukar, laga di phir kisi ne mujhe wahi kaalee syaahee.